konting basketball at prom

Natatandaan ko pa ang seksing basketball shorts na ito ng Narra. Pati itong T-shirt. Ginamit natin ito nuong Senior’s Week sports fest. Subalit hindi ko matandaan kung nakapaglaro ba ako nun. Malamang ay hindi dahil bano akong maglaro ng basketball. Mahilig, oo; marunong, hindi. Sayang lang ang pagde-day dreaming ko na kasing galing ako ni Dondon Ampalayo ng Ginebra habang nanunuod si Romina.

Sa practice games ng Narra, nakalaro ako nun. Syempre, practice lang naman pero natatandaan ko nun, sinisigawan ako ni Roehl na takbo lang daw ako ng takbo at walang ginagawang iba. Eh coach, gusto ko lang naman magpapawis hehe…

Natatandaan ko pa, nakasama ako ni Trebet at Edge na maglaro sa court malapit sa Morong church, sa tabi ng palayan malapit sa gate ng RTPI. Nung uwian na, tumuwad kami sa gitna ng palayan… este— tumawid pala at naglaro ng pustahan kalaban ang ilang taga-RTPI din na nandun na. Nanalo kami nun gawa ko… o ha.. my misis, hanga ka ba? Madami akong na-score nun dahil lagi lang akong napapasahan nila Trebet sa may side at swertehang napapa-board ko naman, sabay takbong-ULTRA papunta sa kabilang court para magdepensa. Isa ata ito sa tatlong highlight games ng aking basketball career. Pag-uwi, naiwan ko pa ang polong uniform ko. Pakers.

Sa RTPI ako unang nakakita at nakalaro sa isang basketball court na hardwood at fiberglass ang board. Ako’y hanga. Dito din sa gym tayo nag Senior’s Prom. Hindi rin ako marunong magsayaw kaya nanunuod lang ako. Pero bago matapos ang gabi, isinayaw ko ng isang slow dance si Meg.

Di ko alam kung papano tatapusin ang isinusulat kong ito, kung ganito na lang kaya...

Stop.